ماہنامہ عبقری - اپریل 2011ء

حضرت عمر رضی اللہ عنہ کا ایک غلام عیسائی تھا اس کو وہ اسلام قبول کرنے کی ترغیب تو دیتے مگر اس پر کبھی دباو نہیں ڈالا‘ فرماتے کہ مذہب میں زبردستی نہیں‘ غلام ان کی زندگی میں عیسائی ہی رہا۔ حضرت عمر رضی اللہ عنہ نے اپنے عمال اور لشکریوں میں اسلام کی سچی تعلیمات کی ایسی روح پھونک دی تھی کہ ان کے خوف خدا‘ اتباع سنت‘ تقویٰ‘ زہد‘ تواضع‘ خدمت گزاری‘ خلق‘ مہمان نوازی‘ راست بازی‘ عدل‘ ترحم‘ مساوات‘ مخالفین سے حسن سلوک سے متاثر ہوکر مفتوحہ ممالک کے غیرمسلم خودبخود اسلام قبول کرتے چلے گئے۔ شام میں اسلامی لشکر پہنچا تو رومیوں کے سفیر جارج نے اسلام قبول کرلیا۔ مصر کے شہر شطاءکارئیس دو ہزار آدموں کے ساتھ مشرف بہ اسلام ہوا۔ دمشق میں وہاں کا بشپ حضرت خالد بن ولید رضی اللہ عنہ کے سامنے آکر مسلمان ہوا۔ جلولہ کی فتح کے بعد یہاں کے امراءو رئووسا خود اسلام لے آئے۔ قادسیہ کے معرکہ کے بعد ایران کا شاہی رسالہ چار ہزار لشکریوں کے ساتھ مسلمان ہوگیا۔ یزدگرد کے بعض فوجی افسر مسلمان ہوئے تو سیابچہ‘ زط اور اندغارجیسی قومیں بھی اسلام لے آئیں۔ مصر کے بعض قصبے کے لوگ بھی مسلمان ہوئے۔ دمیاط کی فتح کے بعد بقارہ سے لے کر عسقلان تک پوری آبادی مسلمان ہوگئی اور پھر اس حقیقت سے کون انکار کرسکتا ہے کہ عراق‘ شام ‘ مصر اور ایران کے سارے علاقے کی آبادی رفتہ رفتہ اسلام اس طرح قبول کرتی گئی کہ ان میں مسلمانوں کی اکثریت بڑھتی گئی اور وہ اسلامی ممالک کہلانے لگے۔ یہاں مسلمان اپنے روادارانہ کردار کا اعلیٰ نمونہ پیش نہ کرتے تو ان کا اسلام کی طرف مائل ہونا کیسے ممکن تھا تھوڑے سے لوگوں پر تو جبر اور دبائو ڈالا جاسکتا ہے مگر پورے علاقے کو زور اور چیرہ دستی سے کسی مذہب کی طرف مائل کرنا انسانی فطرت کے سراسر خلاف ہے۔ ٭٭٭٭٭٭٭ پچھلا صفحہ